Malgranda birdo
Pensoj de lordo, kiu sin trovas en amara situacio.

Ĉirpanta turto facilmova
soras al la blua ĉielo.
Mi ĉagreniĝas en la koro,
vee al gepatroj sub tero.
Maldormas mi jen ĝis aŭroro,
sopiras ilin kun tenero.

Drinkante tiuj kun saĝeco
povas teni sin neebriaj,
tiuj kun konfuzita penso
drinkas ĝis stato senraciaj.
Kondutu bone kaj laŭdece,
ĉar sortoj estas senvariaj.

Faboj kreskas sur ebenaĵo,
oni plukas ilin konkure.
Insektoj naskas junajn idojn,
vespoj portas ilin plezure.
Eduku viajn filojn bone
heredi bonvirton sekure.

Motaciloj alflugas glise
kun siblaj pepoj en aero.
Mi ĉiutage penas strebe
kaj klopodas kun sinofero
de mateno ĝis nokt’ senĉese
por glorigi patron sub tero.

Ĉirpantaj verdaj fringoj bekas
grajnojn sur draŝeja tereno.
Denaske estis mi povrulo,
nun dronas en procesa ĝeno.
Mi ŝutu manplenon da rizo
por sortodiveni mem kun peno.

Li, diskretema kaj bonkora,
staras kvazaŭ sur arbo alta.
Li, singardema kaj zorgema,
staras kvazaŭ en val’ smeralda,
timema kun anksi’ en koro
sur la glacio paŝo-halta.
elĉinigis Vejdo