Aŭdienco de la regnestro
Feŭdestroj venas al la palaca aŭdienco.

Ni kolektu fabojn kun penego,
enkorbigu ilin orde vere.
Venas feŭdestroj al aŭdienco,
kion donas la regnestr’ prefere
al ili? Sed nenion tut-tute.
Ĉu kaleŝo taŭgas por veturo?
Kaj krome ili tre ŝatas robon
kun desegno draka laŭ mezuro.

Ni kolektu celerion pene
apud fonto kun lirlanta fluo.
Venas feŭdestroj al aŭdienco,
ili vidas flagojn jen en skuo.
La drakflagoj flirtas en zefiro,
sonoriloj tintas kun sonbelo.
La ĉevaloj kvarope galopas,
ili tuj alvenos sub vip-pelo.

Ruĝaj tukoj kovras la genuojn,
vindoj volvas krurojn en bonstato.
Ili vestas sin zorgeme dece
per donacoj de la reĝa ŝtato.
Ili kovas ĝojon en la koro
por asisti l’ reĝon kun plezuro.
Ili kovas ĝojon en la koro
por akiri benojn en futuro.

Kverk’ etendas siajn longajn branĉojn,
la folioj densas en prospero.
Ili kovas ĝojon en la koro
kaj komforte vivas kun gajŝvelo.
Ili naskas ĝojon en la koro
kaj satĝuas benojn en libero.
La sekvantoj obeeme agas,
observas ordonojn kun severo.

Flosas cipresa boat’ laŭ fluo,
kanab-ŝnur’ ligitas al la pruo.
La feŭdestroj ĝojas kaj delicas,
benoj falas por ilia ĝuo.
Ili vivas la komfortan vivon,
benoj venas el la suvereno.
En senĝena vivo ili naĝas
kaj pasigas tagojn sen ĉagreno.
elĉinigis Vejdo