Regnestro Wen
Epopeo dediĉita al Regnestro Wen dum kultado

Regnestro Wen restas sur ĉielo,
brilas lia anim’ kun lumgloro.
Kvankam Regn’ Zhou estas olda ŝtato,
ĝi l’ nova fariĝos kun honoro.
Ĝi jen havos brilan estontecon,
Destinon bonan dotas Ĉielo.
Regnestr’ Wen ascendis ĉielmonden
kaj restas kun Di’ en viv-mielo.

Regnestro Wen, saĝa, asidua,
diskuras lia reputacio.
La Ĉielo helpas lian regon
kaj tronigon tra generacioj.
Liaj posteuloj kaj parencoj
mil mil jarojn viglu en prospero.
Liaj korteganoj, oficistoj
gloru ja en sia kariero.

Korteganoj, konsilistoj saĝas
kaj sagacas ĉiuj ĉe la trono;
ili servas kun diligenteco
kiel ŝtataj fortikaj kolonoj.
En la regn’ naskiĝas talentuloj
por apogi l’ ŝtaton kun fidelo.
Multas ja tiaj kompetentuloj,
li trankvilas kalme sur ĉielo.

Regnestrro Wen montris afablecon
kun akordiĝem’ kaj sinofero.
Providenco estas ĉiopova,
eĉ pranepoj de Shang kun sincero
venas servi jen al lia regno
por subteni la regadon kune
kaj konstrui Regnon Zhou prospere,
por forte vigligi ĝin komune.

Submetiĝo al Zhou estas nepra
ĉar ĝi estas ĉiela ordono.
Ili estis asistantoj de Shang,
sed nun staras en Zhou sub dispono.
Dum ritado en Regno Zhou ili
vestas sin ja en Shang-a kostumo.
Kvankam kiel korteganoj de Zhou,
ili obeas en taskplenumo.

Ne forgesu viajn praprapatrojn,
daŭrigu l’ aferon kun fervoro.
Penu serĉi mil feliĉojn por vi,
ne staru kontraŭ l’ ĉiela volo.
Kiam Yin ne perdis la popolon,
ĝi funkciis laŭ l’ ĉiel-ordono.
Ne forgesu l’ falon de Yin-regno,
ĝi ja estas tragika leciono.

Ne facilas teni providencon,
ne detruu l’ regnon laŭ bontrovo.
Gloru la renomon por eterne,
ruinigon kaŭzas ĉiela povo.
Providenco estas nesondebla,
nek per bonodoro nek per sono.
Regnestro Wen starigas modelon,
lernu ni de li sen fanfarono.
elĉinigis Vejdo