Benoj en kultado
Laŭdkanto pri Reĝo Wen, kiu heredis bonvirtojn de prareĝoj.

Ĉe l’ piedo de tiu monto
la kverkoj kreskas en prospero.
Akordiĝema nia reĝo
jen petas benojn kun sincero.

Tas’ el jado plenas je vino
flavkolora kun bonodoro.
Akordiĝema nia reĝo
ricevu benojn de favoro.

La falkoj flugas en ĉielo,
la fiŝoj saltas el profundo.
Akordiĝema nia reĝo
kultivas homojn en abundo.

La vino jam metitas orde,
kaj pretas bovo por ofero.
Prapatrojn oni kultas pie,
preĝante por feliĉa helo.

Arbaron vastan de la kverkoj
bruligas oni en kultado.
Akordiĝema nia reĝo
baniĝu en dia beato.

Sovaĝaj vitoj en denseco
alvolvas arbojn en spiralo.
Akordiĝema nia reĝo
jen sidas sub feliĉ-vualo.
elĉinigis Vejdo