Reĝo Wu
Laŭdo pri Reĝo Wu, kiu heredis la bonajn virtojn de Reĝo Ji kaj Reĝo Wen, kaj starigis modelon por siaj posteuloj.

Zhou-regno prosperas en talentuloj,
aperas reĝoj saĝaj por nacio.
Tri reĝoj restas nun en la ĉielo,
Reĝo Wu jam sukcedas laŭ l’ linio.

Reĝo Wu jam sukcedas laŭ l’ linio,
heredas li bonvirtojn de prapatroj,
kaj sekvas la ordonon de l’ Ĉielo,
li ja fidindas en la reĝa kadro.

Li ja fidindas en la reĝa kadro,
starigas li modelon por popolo.
Li bonkondutas imite prapatrojn
kaj ĉiam sindonemas laŭ la volo.

Plebanoj amas Reĝon Wu respekte,
ĉar li obeas al la leĝ’ natura,
kaj tenas sindonemon en la koro,
li noblas kun la koro senmakula.

La sukcedantoj montras sin bonvirtaj,
prapatrojn sekvas en regad’ prudenta.
Mil kaj mil jarojn ili ĝuas benojn
kaj sidas trone kun la kor’ kontenta.

Ili sidas trone kun kor’ kontenta,
alvenas tributuloj por gratulo.
Mil kaj mil jarojn ili ĝuas benojn
kaj havas asistadon kun plezuro.
elĉinigis Vejdo