Reĝoj Wen kaj Wu
Panegiro al Reĝoj Wen kaj Wu pro iliaj meritoj en regado.

Tronas Reĝo Wen kun bona famo,
ĉiuj lin prilaŭdas tra la regno.
Por la pleb’ en paco kaj balzamo,
li sukcesas fondi l’ bonan regnon.
Kia bona suveren’ kun amo!

Sub ordono jen el la Ĉielo,
li sukcesis akiri meritojn.
Regno Chong malvenkis sub konkero,
kaj li fondis la ĉefurbon ĉe Feng.
Kia brava reĝo sur la tero!

Konstruigis li kontraŭ invado
durajn murojn ĉirkaŭ la ĉefurbo.
Li ne ĉasis profitojn laŭ ŝato,
sed modelon de prapatroj sekvis.
Kia nobla reĝo de la ŝtato!

Estas granda ja lia merito,
granda kiel larĝa la urbmuro.
Ĉiuj regnoj venis sen hezito
por tributo al Regno Zhou kune.
Kiel li sagacis en milito!

Orienten fluas Wei-rivero,
ni Yu-n dankas tre pro akvo-rego.
Ĉiuj regnoj venis kun prefero
jen por imiti modelon lian.
Kiel penis li kun sinofero!

Reĝo Wen defendis per akv-zono
la ĉefurbon ĉirkaŭ la tereno
de direktoj kvar laŭ la bezono
por ja sekurigi l’ vastan regnon.
Kiel granda estis li sur trono!

Reĝo Wu, laŭ la ĉiela volo,
jen establis la ĉefurbon ĉe Hao.
li eklaboris laŭ l’ orakolo,
ĉio iris glate kaj sukcese.
Kiel li perfektis kun bonkoro!

Ĉe river’ Feng herboj kreskas dense,
Reĝo Wu klopodis por la regno.
Li ŝpinadis planojn ja enpense
por feliĉojn krei por la idoj.
Kiel skizis l’ onton li klarmense!
elĉinigis Vejdo