Pri Grafo Shen
La epopeo kantas pri investado de grafo al Shen, kiu, kiel komandanto, gvidis trupojn defendi la sudan landlimon.

Impone montoj firme staras,
tre alte jen ĝis la ĉielo.
La feoj de la montoj venis,
naskiĝis Shen kaj Fu sur tero.
Regno Shen kaj Regno Fu estas
superaj en Zhou-dinastio,
kaj baras invadon de l’ fremdaj,
kaj muras ĉe la limlinio.

Grafo Shen estas diligenta
en la palaca registaro.
En sia regn-ĉefurbo ĉe Xie
li elstaras en regn-najbaroj.
La reĝ’ ordonis al li gvidi
konstruon de domoj en sudo,
kaj vivi tie kun decido
por teni l’ regnon en la tuto.

La reĝ’ ordonis al li esti
modelo en sud-regiono
kaj pere de ĉeloka forto
konstrui novan muro-zonon.
Ordono de la reĝ’ alvenis:
ke li difinu l’ landan limon
kaj korteganoj oldaj vivu
kun graf’ Shen tie en intimo.

La finkonstruon de Regno Shen
grafo Zhao entreprenis vere.
La urbmuroj estis solidaj,
la templ’ jam konstruiĝis bele.
Aspektas l’urbo ja majeste,
la reĝ’ premiis al Shen bone:
stalonoj kvar fortikaj korpe
brustornamitaj or-blazone.

La reĝo forsendis grafon Shen
al Xie per kaleŝo orflava.
“Zorgeme planu l’ urbon tie,
la suda regno ’stas bonhava.
Donacas mi jadplaton al vi,
ĝi estas la landa trezoro.
Foriru kun trankvilo, grafo,
defendi l’ landon kun fervoro.”

Grafo Shen pretis ekvojaĝi,
la reĝ’ lin ĝisis per festeno.
Decidis Shen alsuden iri
por defendi limon kun peno.
La reĝo petis de Grafo Zhao
defini la landlimon bone,
pretigi sufiĉe da greno
rapide iri laŭordone.

Bravulo Grafo Shen ekiris
al Xie, la bona lok’ de belo.
Sekvantoj liaj marŝis vice,
plebanoj kriis kun ĝoj-helo.
Modele li elstaris vere
en popolanoj, kun la gloro.
Impresis li majeste, brave,
lin plebo amis kun adoro.

Kondutis li kun bonaj virtoj
afable, milde kaj bonkore.
Li tenis regnon en bonordo,
famiĝis ĉie li honore.
Mi, Ji Fu, kantas per poemo
por laŭdi lin ja el la koro.
Prezentu mi ĉi versliniojn,
al graf’ Shen, granda la sinjoro.
elĉinigis Vejdo