Pri ĉefministro Shan Fu
Laŭda odo pri la elstara talento de ĉefministro Shan Fu.

La Ĉielo kreis la homaron,
ĉio aranĝitas en bonordo.
Homoj tenas la denaskan econ,
ĉiuj amas virtojn en akordo.
La Ĉiel’ rigardas nian regnon,
ni preĝadas sub ĝi kun aspiro.
Por protekti sian filon de Zhou
ĝi generis Shan Fu kun saĝ-brilo.

Shan Fu havas la denaskajn virtojn:
milde kaj afable, sed severe.
Li aspektas bele kaj impone,
kaj kondutas diskreteme vere.
Sekvas li instruojn de prareĝoj,
kaj plenumas vortojn jen kun peno.
Li obeas al la reĝa volo,
kaj ordonojn faras jen sen ĝeno.

Al Shan Fu ordonas la regnestro
starigi modelon por la lordoj:
servi kiel siaj antaŭuloj
helpi l’ reĝon per sekuraj manoj;
kaj ordoni anstataŭ la reĝo,
esti lia gorĝ’ kaj parolilo;
pasigi ediktojn al feŭdregnoj,
kiuj tuj reagas kun facilo.

La ordono reĝa ja solenas,
li plenumas ĝin kun tutanimo.
Shan Fu vere konas kun precizo,
kio bonas al regna destino.
Li prudentas kun erudicio,
kaj kondutas takte kun bonfamo.
Li klopodas pene tag’ post tago
por defendi l’ regnon por ĉiamo.

Kiel antikvuloj iam diris:
“Oni manĝas ion molan vole,
sed elvomas ion duran certe.”
Li malsame manieras sole:
li neniel manĝas la molaĵon
sed ne vomas la malmolan ele.
Li ne tiranadas la malfortajn
timas nek la fortajn senŝancele.

Ankaŭ kiel antikvuloj diris:
“Virto ŝajnas plumo de leĝero,
ĝin malmultaj povas levi alten.”
Mi decidas kun la konsidero,
ke nur Shan Fu ’stas levanto tia,
li ne petas helpon el Ĉielo.
Se la reĝa robo difektitas,
li ripari povas ĝin al belo.

Kiam Shan Fu vojaĝas survoje,
kvar ĉevaloj lian ĉaron tiras.
La ĉaro rapide kuras knare
kaj oni fini l’ taskon deziras.
Kvar ĉevaloj jen galopas urĝe,
ok tintiloj bronzaj sonas klare.
Ordonitas iri li eosten
por konstrui urbon solidare.

Kvar ĉevaloj jen galopas urĝe,
ok tintiloj bronzaj sonas klare.
Al Qi-regno li ekiras prete,
li revenu glate kaj senbare.
Mi komponas por li ĉi laŭdkanton,
kiel blovas freŝa briz’ leĝere.
Mia koro iras al vi, Shan Fu,
ĉantas mi ĉi kanton por vi vere.
elĉinigis Vejdo