Ekspedicio kontraŭ Regno Xu
Odo pri Reĝo Xuan, kiu persone gvidis ekspedicion por konkeri Regnon Xu.

Reĝo Xuan saĝas kun prudento,
nonumis li ministron ĉefo,
kies prapatro estis Nan Zhong.
La reĝ’ admonis lin pri devo:
“Ordigu la ses trupojn bone,
pretigu la armilojn vere.
Jen nepras teni vin gardemaj
por regi l’ sudon senŝancele.

La reĝo diris al Yin Jifu
taski al ministro Xiu Fu, do:
“Aranĝu trupojn en linioj
kaj marŝu rekte al la sudo.
Laŭ Huai-rivero militiru,
observu Regnon Xu detale.
Armeoj tri ne garnizonu,
ne ĝenu l’ plebon malbonfare.”

Kun imponeco kaj digneco
Reĝo Xuan montris sin majesta.
La reĝaj trupoj marŝis brave,
sen halto kaj sen ĝen’ infesta.
Tumultis trupoj de regno Xu,
kaos’ jam regis sen batalo.
kiel tondr’ eksonas horore,
Regno Xu staris ĉe fatalo.

Reĝaj trupoj avancis brave,
la malamikojn batis forte.
Militĉaroj sturmis antaŭen,
verŝajne tigre disŝir-morde.
Laŭlonge de la riverbordoj
tre multis kaptitaj soldatoj.
La reĝaj trupoj kaptis l’ urbon
kaj garnizonis kun paradoj.

Potencis la armeo reĝa,
kiel birdoj flirtas ekzalte,
kiel la rivero torentas,
kiel montoj staras tre alte.
Similis ĝi al torentfluo
nebarebla sen interrompo.
ĝi estis nevenkebla forto,
ĝi kaptis sudon kun aplombo.

Reĝo Xuan saĝas kaj sagacas,
regn’ Xu jam tributas obee.
Ĝia reĝo venas por paco,
ni kantu por li epopee.
Kvieto regas en la mondo,
la reĝo de Xu ne ribelas.
Tumulto jam ne plu leviĝos,
la reĝo diras “ĉio belas!”
elĉinigis Vejdo