Kamplaboroj
Himno priskribanta la tutjarajn kamplaborojn kaj kultadon post rikolto.

Per brilanta, akra la plugilo
ni plugas teron sur suda parto.
Ŝutas ni diversajn semojn grenajn,
ili tuj ekkreskas ja sen halto.
Niaj homoj venas al la kampoj
portante manĝaĵojn de milio
en rondformaj korboj el bambuo
por satigi nin kun ventra krio.
Kun pajloĉapeloj sur la kapo,
falĉas herbojn ŝvite ni kun peno,
el la kampoj pretaj por kultivo.
Putraj herboj bonas por la greno,
en la kampoj densas la plantaĵoj.
Svingas ni falĉilon kun fervoro,
greno rikoltita alte montas,
kiel muro de blanka koloro.
La pajlstakoj staras en linioj,
grentenejoj mil kaj mil plenplenas,
inoj kaj infanoj ekripozas.
Por kultad’ ni buĉi bovon venas,
bovaj kornoj alte kurbaj belas,
laŭ la tradicio de prauloj
al malnovaj moroj ni fidelas.
elĉinigis Vejdo