Ĉevaloj
Himno laŭdanta Dukon Xi de Lu, kiu paŝtis ĉevalojn en sovaĝejo, sed ne en kampoj.

Altaj kaj fortikaj la ĉevaloj
paŝtas sin sur sovaĝejo fora.
Kelkaj blankaj, kelkaj flav-koloraj,
kelkaj nigraj, kelkaj noble rufaj.
Ili ja galopas kun fortpleno.
Duko Xi agas kun klarvideco,
li pretigas sin por militveno.

Altaj kaj fortikaj la ĉevaloj
paŝtas sin ĉe la bord’ de l’ rivero.
Kian koloron ĉevaloj havas?
Kelkaj nigraj, ruĝa de malhelo,
kelkaj brunaj, kelkaj noble flavaj.
Ili tiras ĉarojn kun plenforto.
Duko Xi pensas kun klarvideco,
li sin pretigas kontraŭ norda hordo.

Altaj kaj fortikaj la ĉevaloj
paŝtas sin ĉe rand’ de monto alta.
Kian koloron ĉevaloj havas?
kelkaj blankaj, kelkaj helsmeraldaj,
kelkaj grizaj, kelkaj makulplenaj.
Ili tiras ĉarojn kun fervoro.
Duko Xi havas klaran vidkampon,
li preparas sin jen sen langvoro.

Altaj kaj fortikaj la ĉevaloj
paŝtas sin sur la herbej’ ebena.
Kian koloron ĉevaloj havas?
kelkaj rufaj, kelkaj pal-rubenaj,
kelkaj ruĝaj, kelkaj hele grizaj.
Ili trotas kun paŝa leĝero.
Duko Xi havas menson klarvidan,
li preparas sin jen por konkero.
elĉinigis Vejdo